各位親友,好多謝你地來悼念我二哥鍾詩傑。二哥的離逝,確實令我地感到傷感同婉惜,但喺另一方面,透過佢呢個病,亦都帶來咗好多美意。

我地三兄妹自細係亞嫲湊大嘅,二哥好叻,細細個讀書成績已經非常突出,尤其是數學科。中學時期,佢開始幫人補習,自己供養自己,自力更新,學業上更獲得優異的成績,在美國依理諾大學拿到博士學位。佢曾經任教荃灣保良局姚連生中學、九龍華仁書院,西安嘅交通大學同出任香港大學數學系教授,可謂桃李滿門,德高望重,受到好多學生嘅敬重。

細個時,我同二哥嘅感情幾好,中學之後,大家嘅關係開始疏離,因為佢搬咗出去住,過獨立嘅生活;之後佢又去咗美國深造同西安教書,我同佢有一段時間係斷咗聯絡。

不過大約十年前,天主俾我喺一個好偶然嘅機會撞番佢,當時佢喺我隔離枱打乒乓波,見番佢都好興奮,但係大家都只係保持普通的聯繫。

由於各自喺唔同嘅環境成長,我對二哥嘅認識唔係好深,佢一向俾我或者其他人嘅印象都係沈默寡言、孤僻、冷淡同漠不關心,好難明白佢嘅內心世界。但係透過佢個病,天主改變咗我二哥,讓佢學識表達自己,從而讓我認識到我二哥原來係咁有愛心、善心同關心別人、樂於助人。

二哥係獨身嘅,大概三年前提中退休返中山定居,舊年清明節,我打電話約佢拜山,發覺佢咳左好耐,於是建議佢返香港檢查。結果證實患左末期肺癌,接受咗一個化療療程,病情有D好轉,佢又再次返回中山,一路食住中藥去穩定病情。可惜冇耐病情再度惡化,氣喘多咗,我就邀請佢番香港到我屋企,等我有機會照顧佢。


Home
ChungSiKit_02
This Web Page Created with SiteSpinner Website Design Software