患病期間,我不斷為佢祈禱,聖母媽媽話俾我知三個字:「只管愛」,我知道天主想二哥感受番咁多年來所缺乏嘅愛同家庭嘅溫暖。

喺我屋企,我同二哥共聚左三個星期,我盡心盡力照顧佢,佢胃口唔好,我就預備D佢鍾意同食得落嘅菜式、生果同甜品,佢緊張,我又同佢按摩放鬆,而二哥亦都處處關心我嘅需要,又幫助我維繫一個和諧嘅家庭。

我記得有一朝,我沖咗杯奶俾二哥飲,跟住佢就好感性咁同我講:「亞玲,呢段日子,辛苦你啦!」當時我好感動,因為二哥以前從來都唔識表達佢會體恤他人,之後,我就傷心咁回應佢:「你病咪仲辛苦。」然後我地大家就攬住一齊喊。我想信此時此刻,我地彼此都感受到對方嘅愛。二哥曾經話俾我知,佢最難忘嘅時刻,就係患病時同我一齊相處嘅時刻,而我亦都非常珍惜呢段日子。

今年六月,我曾經送咗一份生日禮物俾二哥,就係呢個「愛」的cushion,當時佢多謝咗我,但我感覺到佢領悟唔到我嗰份情意,仲同我講咗一D真愛嘅道理。但係而家,我深信佢能夠真正感受到我地兄妹嘅愛同親情。

喺住院期間,好多親友到醫院探二哥,佢叮囑大家要愛我地嘅家庭,愛我地身邊嘅人,愛我地嘅工作,要做個好人,孝順父母,要原諒別人嘅過失同彼此修和。

二哥同時亦都係好謙卑同貶抑自己,佢可以默默咁放棄喺香港嘅高薪職位,去咗西安教書,之後番香港,又甘願喺港大出任暫時性質嘅教授,留番機會俾嗰D更有需要嘅人。佢又唔計較名利,設計咗一D新高中教學課程數學科嘅補充資料,擺上網俾學生免費瀏覽。除此之外,過身後佢將所有嘅資產捐贈予本港同內地嘅慈善團體,造褔貧苦大眾。佢呢份無私為人嘅精神,實在係值得表揚嘅,二哥,我地以你為榮。


ChungSiKit_01
ChungSiKit_03
Home
This Web Page Created with SiteSpinner Website Design Software